بدون أسباب... ضاع حلم آلاف الشباب في مسابقة "مساعد أخصائي خدمات إسعافية
في نوفمبر 2025 أعلنت هيئة الإسعاف المصرية بالتعاون مع الجهاز المركزي للتنظيم والإدارة عن مسابقة "مساعد أخصائي خدمات إسعافية".
كانت الفرصة اللي مستنيها آلاف الشباب اللي نفسهم يخدموا بلدهم في أصعب وقت وأخطر مكان: عربية الإسعاف.
تقدمنا كلنا، واستوفينا الشروط، ودفعنا، واتصورنا، وقدمنا ورقنا.
وفي يناير 2026 دخلنا الاختبار الإلكتروني. ذاكرنا شهور، وسهرنا، ونجحنا بمجهودنا. طلعت النتيجة وكنا فرحانين: "مؤهل للمقابلة الشخصية".
رحنا المقابلة الشخصية في مقر هيئة الإسعاف بأكتوبر في شهر أبريل 2026.
دخلنا اللجنة واحنا قلوبنا بتدق. المقابلة كانت سؤال واحد بس: "عرف نفسك".
طلعنا وإحنا بنقول الحمد لله، أدينا اللي علينا.
وبعد الانتظار نزلت النتيجة... وكانت الصدمة: "غير لائق / ساقط"
هنا وقفنا وسألنا: ليه؟
ازاي أسقط بعد ما نجحت إلكتروني؟
ازاي أسقط في مقابلة مدتها 30 ثانية؟
الأغرب والأوجع إن اللي سقطوا كان فيهم أوائل كليات، وكان فيهم ناس معاها ماجستير، وكان فيهم ناس اشتغلت تطوع في الإسعاف سنين.
احنا مش بنهاجم حد اتقبل. ربنا يوفق الجميع ويستاهلوا.
احنا بنسأل سؤال واحد بس: فين معايير التقييم؟ فين الشفافية؟
احنا تعبنا. ضيعنا شهور من عمرنا في مذاكرة ومناهج طبية وإسعافات.
صرفنا فلوس مواصلات وسفر للقاهرة عشان مقابلة.
بنينا حلم إننا نلبس اليونيفورم ده وننقذ أرواح.
النهاردة الحلم ده بيضيع بسبب نتيجة مبهمة ومقابلة شكلية.
لذلك نناشد:
1. الجهاز المركزي للتنظيم والإدارة: بفتح تحقيق عاجل ومراجعة نتائج المقابلات الشخصية لمسابقة الإسعاف.
2. هيئة الإسعاف المصرية: بإعلان معايير النجاح والرسوب بوضوح، وإعادة تقييم من اجتاز الاختبار الإلكتروني واستوفى الشروط.
3. كل مسؤول شريف: ادونا حقنا في تكافؤ الفرص. مش طالبين واسطة، طالبين عدل.
إحنا مش رقم في كشف. إحنا شباب كان كل حلمه إنه يخدم مصر.
ما تضيعوش تعبنا على الفاضي. ادونا فرصة تانية عادلة.,